CEBU, Philippines — Ang Tiger Ship Builders midominar sa Leg 2 sa Bigway Sports-Crossover 3×3 Basketball League Season 2 Holiday Rush nga gipahigayon sa Cebu Wing sa SM Seaside City niadtong weekend.
Gilangkoban nilang Jaybie Mantilla, Shaq Imperial, Jonel “Tansiong” Bonganciso ug Vincent Minguito ang Ship Builders mipiog sa Taho Story, 21-19, sa kulbahinam nilang sangka sa final aron sakmiton ang titulo.
Gawas nga mibulsa og P10,000, ang Tiger Ship Builders nakapupo sab og 100 puntos aron pag-angkon og atomatik nga lun sa playoffs sa Grand Finals uban ang kinatibuk-ang 170 puntos human sa duha ka legs.
Mideretso sab sa playoffs kay naapil sa Top 4 ang Chase Tower Runs (CTR) uban ang 150 puntos, BSL Hoops bitbit ang 130 puntos, ug Badboys x Altrex nga dunay 110 puntos.
Ang ikalima ngadto sa ika-10 nga qualifiers nga mao ang Choz Stop, Taho Story, Tri-A Bulldog, USJ-R, Brgy. Looc-Mandaue ug Cem Starke bahinon sa duha ka grupo ug dayon moduwa og single round robin. Ang Top 2 matag grupo moabante sa knockout playoffs batok sa mga top seeds. Ang Grand Finals gikatakda karong Disyembre 14 diin ang makampiyon modawat og P100,000 nga premyo.